Bieren aus Lëtzebuerg

 

 

 
RENEE        MENG BIEREN        ADOPTÉIERT BIEREN        AWARD        REPORTAGEN        KNOW HOW        KLENG GESCHICHTEN        KONTAKT        KRITZELBICHELCHEN
 
 

 Iwert mech

 

 

Wéi dir jo bestëmmt wësst huet alles mat enger Bastelpackung viru genau 20 Joer ugefaangen. Am September 1997 hunn ech mäin 1. Bier gebutt an zënter dem konnt ech net méi ouni sinn. Während den éischten 10 Joer hunn ech gebutt wann ech Loscht hat, a Loscht hat ech bal ëmmer. Alles war super bis zum Fréijoer 2007.
Meng Cousine huet gemengt ech bréicht onbedéngt eng Websäit a wéi ech dunn argumentéiert hunn dass dat net onbedéngt noutwendeg wier a souwisou ze deier an, an..... dunn huet hatt kuerze Prozess gemaach an huet mir eng Homepage ageriicht. Super an elo? Wéi soll dann elo een sech dat ukucken? Wéi konnt ech déi Adress public maachen?

Also hunn ech mech entschloss eng Annonce an eng Bierenzeitung ze maachen a wierklech, et huet geklappt, lues a lues ass meng Websäit besicht ginn.

Niewent menger Annonce war awer eng Aluedung fir um Euroteddyconcours deelzehuelen. Also hunn ech decidéiert et ze probéieren a mech fir de Concours unzemellen. Ech wousst guer keng Kriterien, näischt, ech hu Fotoe vun 3 Biere gemaach an hunn se agescheckt. Wéi ech dunn op der Euroteddy war an hu meng Bieren niewent deene ville schéinen anere Bieren aus dem Concours gesinn hunn ech awer ferm u mir gezweiwelt. Mee ech krut awer een 1. Präis fir mäin Teddy Anudazumal an der Kategorie Teddybär Urform.

Elo hat mech de Virus richteg erwëscht, ech wollt et wëssen an hu mech dat Joër duerno beim TED word wide award (Teddybierweltmeeschterschaft) ugemellt an ech krut den 1. Präis an der Kategorie Artist.

Vun do un hunn ech all Joer e Concours matgemaach a krut 4 mol een 1., 2 mol en 2. an e mol en 3. Präis.

Meng Clientë ware begeeschtert an ech hunn ugefaangen am Krees ze dréien, ëmmer méi Biere sinn entstanen an et gouf ëmmer méi Nofro. Dat wat emol dee schéinsten Hobby vun der Welt war huet ugefaangen einfach ze vill ze ginn. Ech hu gebutt a gebutt, meng ganz Fräizäit huet sech just nach em d’Teddybiermaache gedréint. Derniewent sinn ech nach schaffe gaang, hu meng Enkelkanner versuergt, d’Haus a de Gaart hu misse gefleegt ginn. Gott säin Dank stoung mäi Mann ëmmer hannert mir an hien huet mir gehollef wou hie konnt.

2016 hunn ech dunn Decisioun geholl: Mir halen op, ab Enn dës Joers gëtt et keng „Bieren aus Lëtzebuerg“ méi. Duerno koumen e puer Wochen déi enorm turbulent waren, jidderee wollt nach eppes hunn an ech hunn alles verkaaft bis op e puer Bieren déi definitiv ni verkaaft ginn. Duerno war Rou.... an ech sinn iergendwéi an e Lach gefall, ech wousst näischt méi mat mir un ze fänken.

Ech hunn et fäerdeg bruecht 3 Méint laang näischt ze maachen, dunn hunn ech erëm e Bier gebutt. Bis elo sinn et der 15 an engem Joer an et mëscht erëm Spaass. An dat muss och esou bleiwen, ech schaffen nach just wann ech Loscht hunn. De Bierevirus ass net esou séier auszerotten, e mutéiert ëmmer erëm.

Ech bleiwen och weiderhi menge klassesche Bieren trei. Bitze maachen ech just nach dagsiwwer a plangen an Zukunft maachen ech guer net méi, et kennt wéi et kënnt. Entweder bitzen ech nach an 10 Joer oder ech halen iergendwann ganz op.

De Moment genéissen ech et dann a wann e Bier ze bitzen an ech hoffen dass meng Clientë mir och nach weiderhin trei bleiwen.